கடந்த இரண்டு அத்தியாயங்களில், முதல் நூற்றாண்டில் தேவனுடைய சித்தத்தின்படி ரோமப் பேரரசுக்கும் இந்தியாவுக்கும் இடையே உருவான கடல்வழி வணிகம், சுவிசேஷம் பரவுவதற்கான ஒரு பாலமாக எவ்வாறு அமைந்தது என்பதைக் கண்டோம். அந்தப் பாதைகளின் வழியே, தொடக்கத்தில் தயக்கம் காட்டிய அப்போஸ்தலனாகிய தோமா, இறுதியில் கர்த்தரின் அழைப்புக்குப் பணிந்து இந்தியாவுக்குப் பயணம் மேற்கொண்டார். தனது அர்ப்பணிப்புள்ள ஊழியம் மற்றும் இரத்தசாட்சி மரணத்தின் மூலம், இந்திய மண்ணில் கிறிஸ்தவ விசுவாசத்திற்கான ஓர் அழியாத அஸ்திபாரத்தை அவர் நாட்டினார் என்பதை பார்த்தோம். இப்போது, அந்த அஸ்திபாரத்தின் மீது விசுவாச மாளிகை எவ்வாறு கட்டப்பட்டது என்பதையும், தோமாவின் விதைத்த விதை எவ்வாறு ஒரு பெரிய விருட்சமாக வளரத் தொடங்கியது என்பதையும் இந்த அத்தியாயத்தில் தொடர்ந்து பயணித்துக் காண்போம்.
அப்போஸ்தலர்களின் பெரும் பிரிவு
பெந்தெகொஸ்தே நாளிலிருந்து சில ஆண்டுகளே கழிந்திருக்கும். எருசலேமின் மேல் அறையில் பரிசுத்த ஆவியின் வல்லமை இறங்கியபின், அந்த சிறிய கிறிஸ்தவ கூட்டம் விரைவாக வளர்ந்தது. ஆனால் இப்போது நேரம் வந்துவிட்டது – கர்த்தராகிய இயேசு கிறிஸ்துவின் மகத்தான கட்டளையை நிறைவேற்ற வேண்டிய நேரம். "பூமியின் கடைசிபரியந்தமும் எனக்குச் சாட்சிகளாயிருப்பீர்கள்" என்று இயேசு கூறிய வார்த்தைகள் அவர்களின் இதயங்களில் எதிரொலித்தன.
பன்னிரண்டு அப்போஸ்தலர்கள் ஒரு மாபெரும் முடிவை எடுத்தனர் - உலகம் முழுவதும் சிதறிச் சென்று கிறிஸ்துவை போதிக்க வேண்டும் என்று. இது வெறும் தற்செயல் அல்ல, மாறாக ஜெபத்தினாலும் பரிசுத்த ஆவியானவரின் வழிநடத்துதலிலும் எடுக்கப்பட்ட தீர்க்கமான முடிவு. ஒவ்வொரு அப்போஸ்தலருக்கும் ஒரு குறிப்பிட்ட பிரதேசம் "ஒதுக்கப்பட்டது" - இந்த வார்த்தை வெறும் மனித திட்டமிடலை அல்ல, மாறாக தேவனுடைய மேலான திட்டத்தைக் குறிக்கிறது.
தோமாவின் சவாலான பணியிடம்
ஆண்டவரின் இந்த திட்டத்தில் தோமாவுக்கு மிக சவாலான பணியிடம் கிடைத்தது - பார்த்தியா. முதல் நூற்றாண்டில் பார்த்தியா என்பது வெறும் நாடல்ல, ரோம் பேரரசுக்கு நிகராக இருந்த மாபெரும் வல்லரசு. யூப்ரடீஸ் நதியிலிருந்து சிந்து நதி வரை, காஸ்பியன் கடலிலிருந்து பாரசீக வளைகுடா வரை பரந்து விரிந்திருந்த இந்த பேரரசு நவீன ஈரான், ஈராக், ஆப்கானிஸ்தான் மற்றும் மத்திய ஆசியாவின் பெரும் பகுதிகளை உள்ளடக்கியிருந்தது.
எருசலேமிலிருந்து பார்த்தியா செல்வது என்பது வெறும் புவியியல் பயணம் அல்ல - அது முற்றிலும் மாறுபட்ட கலாச்சார உலகத்திற்குள் நுழைவது. ஜொராஸ்ட்ரிய மதம் ஆழமாக வேரூன்றி இருந்த இந்த நாட்டில், பல்வேறு மொழிகளும் பழக்கவழக்கங்களும் நிலவின. தோமாவுக்கு வேறு எந்த அப்போஸ்தலரை விடவும் மிக கடினமான சவாலான பணியிடம் கிடைத்தது என்பது தெளிவு.
ஒரிஜனின் அமைதியான சாட்சியம்
இந்த வரலாற்று உண்மையை நமக்கு அறிவிப்பவர் அலெக்ஸாண்டிரியாவின் ஒரிஜன் (கி.பி. 185-254). மூன்றாம் நூற்றாண்டின் இந்த மாபெரும் இறையியலாளர் மற்றும் வேதாகம விளக்குனர் தனது ஆதியாகமம் மீதான விளக்கவுரையில் இந்த குறிப்பு வைக்கிறார். அவரது வார்த்தைகள் எளிமையானவை, ஆனால் அவற்றின் கனம் அளவிடமுடியாதது:
"இதற்கிடையில் நமது இரட்சகரின் பரிசுத்த அப்போஸ்தலர்களும் சீடர்களும் உலகம் முழுவதும் சிதறடிக்கப்பட்டனர். பாரம்பரியத்தின்படி, பார்த்தியா தோமாவுக்கு அவரது உழைப்புக்கான களமாக ஒதுக்கப்பட்டது."
அறிவார்ந்த நேர்மையின் சாட்சியம்
ஒரிஜன் இங்கே "பாரம்பரியத்தின்படி" என்று கூறுவது குறிப்பிடத்தக்கது. அவர் நேரில் கண்ட சாட்சி அல்ல, உடனடி வெளிப்பாடு கூறவில்லை. மாறாக, "பாரம்பரியத்திலிருந்து" தனக்கு கிடைத்த தகவலை நேர்மையாக பதிவு செய்கிறார். இந்த அறிவார்ந்த நேர்மை உண்மையில் அவரது சாட்சியத்தின் நம்பகத்தன்மையை அதிகரிக்கிறது.
அப்போஸ்தலர்களின் காலத்திலிருந்து ஒரிஜனின் காலம் வரை - சுமார் இரண்டு நூற்றாண்டுகள். இந்த நீண்ட காலப்பகுதியில் கிறிஸ்தவர்களின் வரலாற்று நினைவுகள் கவனமாக பாதுகாக்கப்பட்டு பரிமாற்றம் செய்யப்பட்டன. தோமாவின் பார்த்தியா மிஷன் பற்றிய தகவல் இந்த பாதுகாப்பான பாரம்பரிய சங்கிலியில் ஒன்று.
யூசீபியஸின் பொறுப்பான பாதுகாப்பு
ஒரிஜனின் இந்த முக்கியமான சாட்சியத்தை வரலாற்றுக்கு பாதுகாத்தவர் சீசரியாவின் யூசீபியஸ் (கி.பி. 265-340). "திருச்சபை வரலாற்றின் தந்தை" என்று அழைக்கப்படும் இந்த மாபெரும் வரலாற்றாசிரியர் தனது திருச்சபை வரலாற்றின் மூன்றாம் புத்தகத்தில் ஒரிஜனின் வார்த்தைகளை கவனமாக பாதுகாத்தார்.
யூசீபியஸ் ஆதாரங்களுக்கான கடுமையான அணுகுமுறைக்கு புகழ்பெற்றவர். அவர் நம்பகமான மற்றும் நம்பகமற்ற தகவல்களை வேறுபடுத்தி அறிந்தவர். அவர் ஒரிஜனின் இந்த கூற்றை தனது நூலில் சேர்த்தது அவர் அதை வரலாற்று ரீதியாக மதிப்புமிக்கதாக கருதினார் என்பதை காட்டுகிறது.
மகத்தான பாரம்பரியத்தின் தொடக்கம்
தோமாவின் பார்த்தியா மிஷன் மூலம் தொடங்கிய கிறிஸ்தவ சாட்சியம் இன்றுவரை தொடர்கிறது. அவர் விதைத்த விதைகள் பல நூற்றாண்டுகளாக வளர்ந்தன. கிழக்கு கிறிஸ்தவ பாரம்பரியத்தின் வேர்கள் இங்கேதான் உள்ளன.
ஒரிஜனின் அமைதியான ஆனால் ஆழமான சாட்சியம் அப்போஸ்தலர்களின் தைரியத்தையும் அர்ப்பணிப்பையும் நமக்கு நினைவூட்டுகிறது. அவர்கள் தங்கள் உயிரைப் பொருட்படுத்தாமல் கர்த்தரின் மகத்தான கட்டளையை நிறைவேற்றினர். (தன் ஜீவனைக் காக்கிறவன் அதை இழந்து போவான். தன் ஜீவனை இழந்துபோகிறவன் அதைக் காப்பான். மத்தேயு 10:39) பார்த்தியா போன்ற தொலைதூர நிலங்களில் நற்செய்தியின் ஒளியை ஏற்றிவைத்தனர்.
இந்த வரலாற்று சாட்சியம் இன்றைய நமக்கும் ஒரு சவாலை விடுகிறது - மகத்தான கட்டளையை நிறைவேற்றும் பணியில் நாமும் பங்கேற்க வேண்டும். "பூமியின் கடைசிபரியந்தமும் சாட்சிகளாய் இருங்கள்" என்ற இயேசுவின் கட்டளை இன்றும் நமக்கு பொருந்தும்.
அப்போஸ்தலர் தோமாவின் பார்த்தியா மிஷன் - ஒரிஜனின் எளிய ஆனால் ஆழமான சாட்சியத்தின் மூலம் நமக்கு அறியப்படும் இந்த வரலாற்று உண்மை - ஆரம்பகால திருச்சபையின் உலகளாவிய பார்வையையும் கிறிஸ்துவுக்கான அவர்களின் அர்ப்பணிப்பையும், கிறிஸ்துவுக்குள்ளான அவர்களின் சாட்சியுள்ள வாழ்க்கையையும் நிரூபிக்கிறது.
"பரிசுத்த ஆவி உங்களிடத்தில் வரும்போது நீங்கள் பெலனடைந்து, எருசலேமிலும், யூதேயா முழுவதிலும், சமாரியாவிலும், பூமியின் கடைசிபரியந்தமும் எனக்குச் சாட்சிகளாயிருப்பீர்கள் என்றார்." - அப்போஸ்தலர் 1:8
தொடர்ந்து பயணிப்போம்....
படைத்தவரின் பாதையில்,
திருமதி. ரெமினா சுஜித்